EZ EGOTEA EGOTEKO MODU BAT DA

Elezahar batek dio

bele zahar batek

txio egiten duela

zure etxeko teilatuan.

Zu ez zauden gauetan.

Bele berri baten kantuak,

ordea, eleberria ekarri zidan bart.

Belea kaiolan omen duzu orain,

elea boligrafo gastatuetan.

Ez zaitu nekatzen

etxean ez egoteak?

Gaur nik egingo dut

txio zure etxeko teilatuan;

katu beltza etorri

eta hegan, ihesi joatera

derrigortzen nauen arte.

Ez zaitu nekatzen

etxean ez egoteak?

Ez dakizu zeinen ondo ikusten diren

izarrak hemendik goitik.