KONSTELAZIOGINTZA

Ez dago ilunik

argirik ez bada.

Izarrek gorputz mutu

bilakatzen gaituzte,

infinituaren zati ezezagun:

galdera ikur soil.

Erantzunik behar ez duen

baina erantzun guztiak nahi dituen

galdera ikur bakan.

Mututzen zaizkigu begiradak

ezerezean formak

aurkitzeko gogo itsuz gaudenetan.

Abstraktua eta surrealista

elkartzen diren puntu zehatz hori:

kartoizko galdera ikur bat.

Galdera guztiak ez dizkizut

erantzuten ahal

are, ez dut ahalmen hori

izan gura.

Dena ez da

arrazional,

kimiko,

organiko.

Jakin egin behar da

posible dela

forma ezezagunekin

topo egitea.

Geuk sortu ezean,

ez da sekula

ingerada ezagunik agertuko

puntu zurietan.

Ez dakit zergatik

galtzen dugun denbora

konstelaziogintzan.