PLANTO ETA AMORE (II)

Bidaiari uko, planto; dagoena dago:

hemen egin dut nire buruarekin tupust.

Alfer-lana da etengabe bete eta hustuz

pentsatzea zerumuga horizontalago

bilaka litekeela; beti kezkatuago

topak topari jarraituz egiteaz zurrust.

Itsaso, laku eta ibai guztietan must

sartzeak ez du esan nahi ur sakonago

ei diren horien kontrapisuaz bizitza

txinparta ñabar eta konfeti bilduma

izango denik, zazpi itsasoetako bitsa.

Altxorra? Ipar-hego eta eskuin-eskuma

begiratzeko moduko etxe baten giltza,

zeinetik, deus ez jakin arren, guztia suma.