URMUGA

Gorputza ura ez al zen, behintzat, hiru laurden?

Ilgorak eta ilbeherak, ziur, zizelkatu

digute umorea, nahiz bueltan deus ez eskatu.

Uraren hotsak dio oraina nola gaur den.

Sigi-saga zuhur, beste batzuetan xuxen,

lotzen gaituenez, berdin, lokabe askatu;

urritu da baina ez du esango barkatu.

Urteak daramatzagu urtzen dena gurtzen.

Ura eta gu beti gara doana fugan.

Xirripa urdin, ur-laster, olatu, uholde,

berdin irautekotan, etengabe aldatu.

Zimur zerrendak ere ibaiak dira gugan;

erreken ziztua, zerbaiten gogorarazle,

eta geu, lapur ñimiño, lurraren urmugan.