URTEZAHAR

Zer metafora da urtezahar-gauez xanpaina?

Ur-jauzi bat esku artean botilatuta:

mantel gain eta hatz-arte oro apartuta,

indarrean dator korrontea, kapitaina!

Kortxoak sukaldeko sabaia jo du baina,

burua dabil burbuilak ezin bezatuta;

eferbeszentziak daramanez gaur batuta,

kemen aerostatikoak bete digu zaina.

Kortxoa ote gara gu errekan flotean,

edo traban den kristalezko sabai pitzatu?

Alkoholak piztu dituen hamaika kantu,

ala korrontea denboraren manupean?

Erantzunik ez dugunez botilan kausitu,

topa egin dezagula hatorren urtean.