URTEBERRI

Hautatu dituzu urte berriko desio

urtero hautatuak eta bete gabeak?

Daudela urrun gaixotasun larri, grabeak,

traumarik gabe ikas ditzagula lezio

zailenak, izanik geure buruen jabeak.

Lagun ezagutu berriaz, nola ba, fio?

—“Zaharrari despedida ona eman banio!”—.

Arditzat gauzka egutegiko artaldeak.

Nahiz eta dirudien tarteka dantza askea,

xakean gailentzen da kale-jira lotua;

peoia bazara peoi legez mugitzea,

ez dorre, ez erregina denez gure patua.

Aurrerantz eta alborantz da nire hautua:

noiz beltza, noiz zuria, bi zaldiz bizitzea.