ALDIZKARIAK LOKATZETAN

Interviú “elkarrizketa” zenik jakin gabe

hipodromoan aldizkari zimurtu zaharrak

aurkituko genituen: titi handi tzarrak,

emakumezkoak, zakil zutunen andare.

Nazka eta erakarmena dira nerabe

hasiberriaren pribilegio —ez bakarrak—:

behin musukatu nuen ikaskide baldarrak

beharturik, eta ez nire nahiaren jabe,

couché papereko izter-zabal biluz hura.

Pornoaren erresuman nire bataioak

narama putzu lohiez betetako lekura.

Fantasiak biluzien posterren kontura

edo aldizkariak usaintzeko ohitura:

akaso beste bizitza baten entsaioak?

Gu gara hirurogeita hamarretan jaioak.