DEDIKATUTAKO LIBURUAK

Badut, etxean, niri ez baina beste nonori

dedikatutako aleren bat edo beste.

Haiek irakurtzean sentitzen naiz erbeste

xelebre baten eroale. Liburu hori

norena ote zen, zer patu eta zer zori

bi pertsonen arteko zilborreste?

Beharbada maitasun bizkor baten berreste

hutsa? Axaleko zen harremana ala lodi?

Telegrama amultsu dira, gutun zintzoak,

orri lakarrean tinta lausoz isuriak;

agian, gauzatu gabeko intentzioak?

Zer pentsa damaigu iragan pultsu finkoak:

mundu-maparen ertzak dauzka kaligrafiak,

gu ere urruntzen goazen kai hartakoak.