ZIRRIBORROEN GORAZARRE

Inora ez doazen zirriborro ederrak:

lerro-dantza, orban gorri, gezi eta tatxoi,

Moby Dick harrapatu ez duten zenbat arpoi!

Saiakera hutsak, dibertimentu herrenak,

letraz guk jaso arren, lapurtuak direnak,

ganbara umeletan idatziak, ez saloi

dotoreetan; izarrik ez, asterisko bat doi;

kaiera trinkoan argi-zoriko kimerak.

Amaitu gabea baino hoberik ba al da?

Lerro bakarrera tolestutako nobelak

garatu gabeko jenialtasunaren galgan;

haiku-kaikuak, nagiaren printza epelak,

trabaturik daudenak moldiztegiko maldan,

harroegi izateko apaleko ale ergelak.