EURIAREN TRAPEZIOA

Ezker-eskuin dabilke jauzi zirimolaka

leihoz bestalde, haizearen menpekoa.

Euri hori ez baita mende honetakoa;

sinestun ginen garaien traza ez al dauka?

Gu guztion soineko izatearen mauka

eta paisajeak kutxiloz lanbrotzekoa;

dabil isil-misilka piztia diskretoa

noiz hemen noiz putzuetan txaloka, txandaka.

Errezel busti, jostailu gara haren menera;

bortitz dator ekaitza, bihotz basatikoa,

alegerago itzuli gaitezen etxera.

Nahi duenean azalean hamaika xera,

kartak berriro nahasi, aurrera jokoa!

Gure bizitza, euriz, erretenean doa.