MUTILAK

mutilak horrelakoak dira

zabarrak alferrak traketsak

ongi ezagutzen ditut

beren zakilaren atzetik doaz datoz

erdi aroko zaldunak bezain

kontu miresgarriak entzun dituzte

eta uste dute neskek lapurtu nahi dieten

altxor bana daukatela hankartean

mutilak horrelakoak dira

ongi ezagutzen ditut

mehatxu txatxuak banatzen dituzte

zuen komunetan sartzen dira

marrazki zatarrak egiteko

eta balentria handi bat burutu balute bezala

egiten dute irri gero ihesi zoroan

ez diote begirik elkarri ez lotsatzearren

mutilak horrelakoak dira

ongi ezagutzen ditut

futbolean aritzen dira panpina buruekin

borroka egin behar dute beren artean

buruzagi anker baten bila dabiltza

letra txarra eskuak zikin galtzak arrastaka

harrotu egiten dira errieta emanda

zabarrak izan nahi dute alferrak traketsak

mutilak horrelakoak dira

ongi ezagutzen ditut

neska entzun eta goitikoa etortzen zaie

beldur dira hitz samurrak ahotan hartzeko

eta burla egiten dizuete

ankerrak dira baina sufritu egiten dutelako da

sekretuz beteak zaudetela ikasi dute

sumatzen hasiak dira erdi arokoak direla

mutilak horrelakoak dira

ongi ezagutzen ditut

zabarrak alferrak izan nahi lukete traketsak

sinets egidazu

banaka neskak bezalakoak dira

baina ez dute bakarrik nahi

taldean behar dute ikara batean bizi dira

kausarik gabeko zaldunak balira bezala

neskak horrelakoak zarete

ergelak mengelak marigelak

sinets egidazu

ongi ezagutzen zaituztet

gure zakil gainean hankalatraba

buruzagi ankerrenaren esanetara

zuei burlaka bazterretan ni eta nire koadrila

sinets egidazu mutilak horrelakoak gara