BEHIN BATEAN BIZI BAGINA

behin batean bizi bagina

zu nor izanen zinateke

Errauskine, Anbotoko Dama

ala hizketan dakien panpina?

behin batean bizi bagina

zu nor izanen zinateke

Herensuge, Pipi Langstrum

ala urrezko orrazidun lamina?

behin batean bizi bagina

zu nor izanen zinateke

Erreka Mari, Obelix, Heidi

ala pirata beltzen bergantina?

behin batean bizi bagina

zu nor izanen zinateke

Prakagorri, Edurne Zuri

ala beso bagako erregina?

behin batean bizi bagina

zu nor izanen zinateke

Txano Gorritxu, Totanka Yotanka

ala Otsokoren letagina?

behin batean bizi bagina

zu nor izanen zinateke

Zaloako katu baltza, Teo

ala gaiztoeneko gibelurdina?

behin batean bizi bagina

zu nor izanen zinateke

Doraemon, Jentilzuloko belea

ala lapurrak gordetzeko osina?

ni berriz akelarreetako printzea!

eta zu, zu nor izanen zinateke

behin batean bizi bagina?

...

ez haiz batere larri oraintxe, sorgina!