BEGIRA EGIOZU GIZON HORRI

Begira egiozu gizon horri,

baso luzanga ardo eta hiru zigarrotxo

mahai gainean dauzkan

gizon zimurtu eta zahartu horri.

Badirudi ez diola ezerk axola,

tabakoa eta ardoa dira

behar duen guztia,

eta ez du ezer gehiago eskatzen.

Begira egiozu gizon horri,

tabernako bazter horretan dagoen gizon baztertu horri.

Badirudi ez diola ezerk axola mundu honetan

momentu honetan,

ez duela lagunik nahi, ezta behar ere,

eta bere bihotz ezin urratuago hori

alkoholez baino ezin duela laztandu.

Gaurkoa bezalako arrats euritsuetan

aterpe ematen diote taberna honetan,

aterpe eta baso luzanga bat ardo,

eta lasai-lasai erreko dituen hiruzpalau zigarrotxo,

bizitzak beti bezain puta jarraitzen duela

ikusten duen bitartean

taberna honetako bazter horretatik.

Begira egiozu gizon horri.

Gau batean botila bat kraskatu eta

amorruz aurre egin zien

barre egiten zioten putakume batzuei,

botila kraskatu

eta akabatu egingo zituela esan zien,

oihuka, samako zaina hanpatuta,

eta dardaraka zeukan eskuaz

zuzendu egin zien

kristal puskatuaren zorrotza,

txerriak bezala akabatu egingo zituela

oihukatzen zuen bitartean.

Begiratu egiozu gizon horri.

Handik ordu laurden batera,

txakurrak agertu eta kanpora eraman zuten,

tabernan zeuden putakumeak xaxaka ari zirela,

eta kale kantoi bateko ilunpean

jipoitu egin zuten

inolako gupidarik gabe,

Jaungoikoaren eta Legearen izenean.

Begira egiozu gizon horri.