1. GUTUNA ARESTIRI

Gabriel,

bihotzak, berbak zein begiradak

dagoeneko

ez dira harrizkoak,

altzairuzkoak baizik,

edo titaniozkoak,

zure egun haietan baino hotzagoak,

eta poesia ez da merkea,

ez da herriaren ahotik debalde jasotzen.

Gabriel,

lore jokoak beka-sari joko bihurtu dituzte

oraingo jauntxoek

kultura babesteko aitzakiaz,

eta metatu egiten dute dena

almazen-jauregi erraldoi eta hutsetan,

izozmendien antzera.

Gabriel,

Askaotik Sendejara

Abusutik Elorrietara

Bilbaon

esperantza

are meharrago,

ilunago eta

laburragoa da.