NI NAIZ CHARLIE DONNELLY

Jameson botila bat eta baso biren inguruan bildu gara

Brendan Behan eta biok Uholde tabernan,

pub sasi-irlandarren kontura barrezka batzuetan,

literaturaz eta borrokaz berbetan besteetan,

whiskey koloreko ordu hauetan.

Bere begietan alkoholaren distira

kartzeletan eman zituen urteen minarekin batera.

Poesia nonahi topa daitekeela aipatu du,

baldin eta bihotzeko begiak erne badituzu,

eta horren ostean, zurrut egin duen bitartean,

egunkariko eskela bat atera eta erakutsi dit:

gizon baten argazkia, izena, abizenak...

        A.A.U.

        Rebelde y antifranquista

        (Fugado del penal de San Cristobal)

        Yo quería dar todo

        antes de que la muerte llegase,

        quedarme vacío

        para que la hija de puta

        no encontrara nada que llevarse.

Poesia eskela batean bertan topa daitekeela diost Behanek,

eta zenduaren borroka egunak ekarri ditu gogora,

Irlandako Connolly Column hura, Frank Ryan buru zutela,

faxismoaren kontrako lubakietara etorri zen garaia,

Tyrone konderriko Charlie Donnelly poeta internazionalista

olibondoen arteko lubakietan tirokatu zuten eguna.

Behanek hori guztia gogoratu ostean,

basoak bete eta errime aldarrikatu du:

Ni naiz Charlie Donnelly,

15 Brigadako poeta!

Eta topa egin dugu,

eta baita basoak hustu ere,

Brendan Behanek eta biok

Uholde tabernan.