HAIKU MAIKU

Poeta miope hau

parke ondoko kafetegi batean jesarri

eta haiku bat idazten saiatzen da,

leihotik zuhaitzei begira,

haiku bat, haiku eder bat,

bost zazpi bost,

zuhaitzei begira.

        Ezkiek gozo

        oparitzen digute

        euren itzala

Irribarre egin du,

kafesnea ahora daramala,

libretan idatzitakoa irakurtzen duen bitartean.

        Ezkiek gozo

        oparitzen digute

        euren itzala

Ezkietara itzuli du begirada,

euren azpian etzanda dagoen gizon beltz bat

cd-z betetako poltsa zarpailtsu pare bat

ikusi barik.

Inork ez daki

gizon beltz hori

bizirik ala hilda dagoen

zeru itsaso zikin honen azpian.

Hala ere

poeta miopeak

ederto bete du etxeko lana

idazleen akademiarako...

bost zazpi bost.