UNE GOXO BAKAN HORIEK

 

Jainkoak erruki direnean

txakurrek atzera jotzen

dutenean,

hi hortxe hago jarrita

Sushi muntaia batean

zotz txinatarrekin eskulanetan

Kirin hartako

bi botila luzeren artean

eta hausnarrean habil patxadatsu

bizirik irten

haizen

infernu-kopuru zenbakaitzari buruz,

seguruenik beste edozeinenak

baino gehiago ez

baina hireak dituk

hire oroitzapenak.

bizirik irtetea oso gauza

xelebrea duk,

eta harritzekoa duk

onik iragaitea

gerra guztietatik,

emakume,

ospitale, kartzela,

gaztaro,

helduaro,

dantza suizida,

ezerezaren

hamarkada guztietatik.

 

orain Sushi muntaia batean hagoela

auzune galdu batean

herrixka batean,

hi baino lehen iragaiten duk

dena

itsumustuan

filme txar/on

batean bezala.

 

hortxe zagok

bakezko

sentsazio estrainio hau.

 

autorik ez

kaletik pasatzen,

hotsik ez.

 

zotz txinatarrei eutsi diek

gizalditan

eta gizalditan

erabili izan bahitu bezala,

entsaladaren osagai ñimiño bat

bereizi duk

plateraren

ertzean.

hortxe daukak,

sasoi betekoa,

xaloa, dohain jainkozkoa,

kauen dios! hain da estrainioa

bizirik egoteagatik

ondo sentitzea,

ohiz kanpoko ezer

egin gabe

eta horrexen

aintza

sentituz,

hire atzean

abesbatza oso bat

bailegoan,

saihesbideak

edo

heldulekuak

baileuden.

 

gora zoak grazia

eta lo zaudek

baita ahateak ere.