HIZKETAN MORALITATEAZ,
ETERNITATEAZ ETA
KOPULATZEAZ

Kalean gora eta kalean behera

azkenean bueltatu egin ziren

besorik gabe edo hankarik gabe edo begirik gabe edo

birikarik gabe edo garunik gabe edo

bizirik gabe, nahiz eta

gerra

irabazita geneukan

eta madam hura atalondoan paratu zen eta

esan zidan,

berdin ziok, diru-tratua egingo diagu

betiko

lez

ze lehergailuek txikitu egin ez badizkiete

beste atalak

oraindik ere txortan egiteko gogoa

izango ditek.

eta hildakoak? galdetu

nion.

hildakoek ez zaukatek ez sosik

ez bururik.

ez al daude berdin

bizirik irtendako asko? sujeritu nuen.

jakina, baina horiei ez zieagu

zerbitzurik eskaintzen.

Jainkoak maite egingo

hau.

seguru zakiat

egingo duela.

eta Berari

eskainiko al dion zerbitzurik?

beti egon izan nauk Berari zerbitzua eskaintzen, heuk

ondo dakik hori: gizonak beti dituk gizon eta

soldaduak beti soldadu eta

gehien maite dutena duk

txortan egitea, ez al duk

uste?

amen, esan

nuen.