YANKEE DOODLE

 

Gaztea nintzen

sabelik ez

alanbrezko besoak

baina sendoak

 

mozkorturik heltzen nintzen fabrikara

goizero

eta talde osoak baino lan gehiago egiten nuen

nekatu gabe

 

morroi zahar hura

Sully izenekoa

Sully irlandar zahar txintxoa

baldarra zen torlojoen maneiuan

 

eta doinu bera txistukatzen zuen

egun osoan:

 

Yankee Doodle herrira

Zalditxoz zen heldu

Luma bat txanoan iltza

Ta makarroia deitu...

 

diotenez urtetan ibili da doinu hori

txistukatzen

 

ni txistukatzen hasi nintzen hain zuzen

berarekin batera

 

ordu luzeak ematen genituen elkarrekin txistuka

berak torlojoak zenbatzen

nik 8 oin luze zuten argiztapen-hornikuntzarako

            fardelak sartzen

hilkutxatan

 

egunak joan ahala

zurbiltzen eta dardaraka hasi zen

musika-notak galtzen zituen noizean behin

 

nik txistuka jarraitu nuen

 

bera egunak galtzen hasi zen

 

gero astebete galdu zuen

 

jakin nuen hurrena

zabaldu zuten berria izan zen

Sully ospitalean zegoen

ebakuntza bategatik

 

2 aste geroago itzuli egin zen makuluarekin

eta emaztearekin

 

bostekoa eman zien guztiei

 

40 urteko gizona

 

erretiro-jaia egin ziotenean

nik galdu egin nuen

izugarrizko

aje bat zela-ta

 

bera joan ondoren

modu arraroan

jarraitu nuen haren bila

eta konturatu nintzen inoiz

ez ninduela gorrotatu, nik

baino ez nuela

gorrotatu

gehiago edaten hasi nintzen

egun gehiago galtzen

 

gero ni ere

kaleratu ninduten

 

ez naiz inoiz kezkatu kale gorrira

botatzeagatik baina huraxe izan zen aldi bakarra

sentitu nuena.