LEHENGO ESTILOKO PUTA BAT
IKUSI DUT

Kinkiladenda merke hartan

ginebra eta vodka bete pinterdi bi erosten

ilelarua zen

dilindan zihoan marra xuri-beltzeko soineko batetik

belaunen parera jausten zitzaiona

eta orkatila luzeak zituen

eta pittin bat potoloa zen

eta mostradoreko neskak sudurra zimurtu zion

zerbitzatzean

baina puta hura jarrita zegoen horrelakoetara

eta zegozkion buelten zain gelditu zen

eta poltsan eramateko botilen zain

eta puta kalerantz abiatu zenean

astiro abiatu zen

eta jendeek aldizkarien gainetik burua altxatu

eta begiratu egin zioten

eta egunkari-saltokiaren ingurutik zebiltzan mutikoek

begiratu egin zioten

eta autoa aparkatzen ari zirenek begiratu egin zioten

eta ni haren atzetik joan nintzen

eta begiratu egin nion

eta bera auto berde batera igo zen

parket-berdea

zigarro bat piztu zuen,

eta seguru nago gidatu zuela autoa toki

magiko bateraino

eta bertan jendeak beti barrez

eta musika beti airean izango zen

eta edariak onak izango ziren

eta altzariak eta alfonbratxoak eder-ederrak

eta mendiak garaiak

eta belar artean etzanda 3 artzain alemaniar,

eta emakumeak amodioa egitean

zuk jakin egingo zenuen amodioa dela

eta prezioa ez zen bizitzaldi bat izango,

bihurrituz joango zen zigarroaren ke urdina

hautsontzi beltzean

garagardoak eta nahasketek apur bat bustian,

emakumeak bildu-bilduan hartuko zintuen

leopardoak antilopea harrapatzeko duen

ziurtasun berberaz,

eta zu irrikaz egongo zinen

emakumea bainontzian ikusteko

italiar opera horietarik bateko

aria bat kantatzen.