ANIMALIA HILEN ARIMAK

Hiltegikoaren ostean

bazen taberna bat kantoiaren bestaldean

eta hantxe jartzen nintzen

eta eguzki sartzeari begira egoten nintzen

leihotik,

leiho bat gainetik orubea ageri zuena

belar txar luze lehorrez josia.

nik ez nuen inoiz dutxa hartzen mutilekin batera

lantegian

beharraren ostean

eta izerdi eta odol-usaina

izaten nuen.

izerdiaren usaina gutxitu egiten da

denbora apur bat pasata

baina odol-usaina hartzitzen hasten da

eta indarra irabazten.

zigarroak erre eta garagardoa edaten nuen

autobusera igotzeko

bezain ondo sentitzen nintzen arte

hildako animalia horien guztien arimak

nirekin batera bidaiatzen

ari zirela;

buru-birada arin bat egiten zuten

andreak altxatu egiten ziren eta aldendu

nigandik.

autobusetik jaisten nintzenean

bloke bakarra nuen ibiltzeko

eta eskailera bakar bat neure

gelara igotzeko

non irratia jartzen nuen eta

zigarroa piztu

eta inor ez zen nitaz

batere arduratzen.