NOR ARRAIO DA TOM JONES?

Bi aste neramatzan

New York-eko

24 urteko neska batekin

bizitzen —gutxi gora-behera

bertako zabor-garbitzaileen

greba-garaian— eta

gau batez 34 urteko

nire emakumea agertu eta

esan zuen, «ikusi nahi diat

lehiakidea». halaxe egin eta gero

zera bota zuen, «ai, hi haiz

neskatxi potxolo puxka pollita hi!»

gogoratzen ditudan hurrenak dira

basa katameen oihuak:

garraxi lazgarriak eta atzaparkadak,

animalia zaurituen auhenak,

odola eta txiza...

ni mozkorrak nengoen eta

galtzontzilotan. saiatu egin nintzen

banantzen baina lurrera jausi eta

belauna urratu nuen. gero hara ziren,

ate metalikoaz bestaldera

etxeko atalondoa igarota

eta akabuan kale erdian.

txakurrada heldu zen

auto-patruilatan. buruen gainetik

zirkulutan zebilen poliziaren helikoptero bat.

komunera erretiratu nintzen

ispilura begira harroxko eta irribarretsu.

ez da ohikoa

55 urterekin horren

gauza bikainak jazotzea.

Watts auzoko kale-istiluak

baino hobea.

34 urtekoa

barrura itzuli zen. txizez bustita zuen

gorputz osoa

eta jantziak

zeharo zirtzilduak eta hari segika

zergatia jakin nahi zuten

txakur 2 sartu ziren.

galtzontziloak egokituaz batera

dena azaltzen saiatu nintzen.