GAITZ BAT DUT ODOLEAN

Gaitz bat dut odolean.

Burdina gehiegi dut.

Belaunaldiz belaunaldi igarotako

gene batek sortua omen.

Hematologoak diost

duela milaka urte sortutako

babes antzeko bat dela nirea.

Nonbait maiz zauritzen ziren

Homo sapiensak, ehizan edo gerratan,

eta gorputzak burdinari eustea

abantaila handia izan bide zen orduan.

Baina gure sasoi modernoetan

soberan dago burdina hura guztia.

Organoetan pilatzen da,

ehizarik eta gerrarik ezean.

Tesiak ere ari dira egiten

nire gaitz honi buruz,

Euskal Herrian eta Pirinioetako mendialdean

omen daude kasurik gehienak,

araztasun genetiko baten adierazle edo.

Hori dena kontatzen dit medikuak,

gustuko filma lagun bati kontatzen dion

berotasun berarekin.

Ni odolusten ari naizen bitartean hain zuzen,

odol-ateratzeak egitea baita gaitzari

aurre egiteko bide bakarra

(aurrehistoriako lanabesak

bezain erremedio bakuna),

hamabostean behin litro erdi odol.

Eta orratz lodia zainetik

sartzen didaten bakoitzean,

orduantxe gogoratzen naiz

nire arbasoez,

nire arraza aratzaz;

eta neure buruari galdetzen diot

zergatik ez ziren urrikaldu nitaz,

zergatik ez ziren garaiz kutsatu,

apur bat bada ere.