TEREZINI BURUZ IRAKURTZEN

Egun, Terezineko kontzentrazio esparruaz irakurtzen,

San Cristobal gotorlekuko botilez oroitu naiz.

Francok hildako errepublikazaleen ehunka gorpu

nola agertu ziren aldean botilak zituztela, Iruñean.

(Diktadoreak elkarren lagunak ziren,

eta biktima guztiak dira neba-arreba).

Hobi komunean lurperatutako presoak ziren,

gurutzerik gabe, zeinurik gabe; soilik botilak.

Eta beira barruan hildakoen izen-abizenak,

jostailuzko belaontziak balira bezala.

O, memoria botila horiek bezain hauskorra da.

Gure bihotzen babesean gorde behar dugu,

amets egiten jarrai dezagun:

begira nola nabigatzen duten

belaontziek askatasunerantz.