SOLOKOETXEKO GREBA

Unibertsitateko lehen urtean

kale garbitzaileen greba.

Zabor poltsen natura hila,

bertan, atari ondoan.

Zuri-beltzezko telebista.

Larrua jotzen ondoko gelan.

Leonard Cohenen poema liburua,

Izuen gordelekuetan barrena,

anaiari lapurtua, elastikorik gogokoena

ostu izan banio bezala.

Solokoetxeko igogailura bidean

langileekin batera nago ilaran.

Heroinazale batek labanaz

bataiatu ninduen leku berean.

Handik jaisten gara hirira,

handik ikusten Bilborik ederrena.

Alde zaharra, tren geltokiaren sabai urdina.

“Itsasoa da, hiriaren erdian itsasoa”.

Mendiak, hodeiak, laster da euria.

Horixe zen nahi nuena.