POETIKA SINDIKAL
GARAIKIDEA

Sekula guztiz heltzerako badoan

presentzia lauso bat baino ez da

iraultzaren ideia nahasia hemen,

baina hala ere igar daiteke aletzen

luxu ezinbestez proletarioen eta

erantzun beharraren presaren artean.

Badu bere tenpoa keinu bakoitzak,

eta badu bere norabidea erritualak;

motel eta haztamuka bada ere,

badoaz konbinatzen klase gorrotoa

eta hizkuntzaren ñabardurekiko

kezka delikatu eta kasik preziosista,

azkenean, beteko ez dela jakinagatik

guztiek ezinbestekotzat duten

erantzun garden batera heltzeko:

bederatzi ez, bi bai, abstentzio bat.