EGARRIA

Ez da askorik gelditzen

baina nahikoa, hala ere,

ospatu nahi dena ospatzeko:

zure keinuen errealitate sendo

baina nahitaez iragankorra,

eta oroimenaren premia.

Heriotzaren larria, bestela,

bere arrasto xumeenekin.

Uraren soiltasuna, adibidez,

mesanotxeko edalontzian,

jadanik ez den egarri bat,

eta zure izarek diotena:

hondakin erromatarren pare,

amildegiak eta muinoak apenas

izandako osotasun batez mintzo diren:

izan ginen, orain ez gara.