AURKIKUNTZA

konpas ezagunak dira nire hatzak

baina galtzen naizelako hala ere

maite dut zure gorputz analogikoa

igande arratsaldeetan emana

ordenagailuan edozeri arduragabe begira

infinitutik ezin urrunago eta beraz

baita inoiz baino ederrago ere

zarata kolore eta mugimendu

hainbeste zilipurdiz nazkatuta

pasio nagi eta muxu nekatuon

zetaz oheratzen dugu elkar

eta aspertuta jotzen dugu larrua

etsipen nolabait domestikatuaz

gure gorputzen uneko egiaz

egia handiagoa sumatuz eta ezkutatuz:

aspertuago geundeke hori gabe

baina denak guztiz errendituta

dirudienean zerbait diozu nitaz

eta egunerokoen artean ahaztutzat

nuen arren deskubritzen dut nire burua

zure ahotsean aukera guztien aurka

irribarrez harrigarriki eder