JARDIN BOTANIQUE

                        Gauza orok darama bere baitan bere hilobia.

                        Beharrezkoa da jaustea

                        larri zauriturik borrokan.

                        Asko maitatzea. Asko sentitzea. Ilargia ikustea

                        gorantz egiten gau askotan

                        arima ilunpean duzula.

                                                                                    Jose Hierro

                                        Joanesentzat

Halaber, ari naiz eskuak irekitzen,

esku hauek hosto koskatuak lakoak.

Egunen zikloa ez lotzeaz dihardut,

zuri ez kentzeaz atalase debekatuen argia.

Nasaitu ditut entziklopedia-hatzak

zu ernaia zarelako, haritza, masusta.

Nola azaldu lupetz bihurtzen dela hautsa;

legar taxutzen harkaitza; ozpin, mahatsa.

Txorikumearen pisua baduzu ozta-ozta,

nakarraren argi mehea harea artean.

Ez sinetsi, mon bijoux, behin soilik maite dela,

gainerako ereintzak itzulmina baizik ez direla.

Izan urarekiko joera; bide gardenak hartu aterpe.

Ohartuko zara inoiz lore higatuen etsiaz.

Ez dakit zer jardin uzten dizudan, semea.

Berde kamuts nahi luke zure udaberrian

kristalezko negutegi honen maketa hautsiak.