OINETAKOEN BISAIA

oinetako urduriak oinetako lasaiak jagon ditut

Madrilgo metroan

oinetako harroak oinetako tristeak

zapaltzen duten lurra abailan mugitzen zaiena

oinetako hezigaitzak eta egarrituak

oinetako auhenkariak lurraren erraietan

oinetako depresiboak eta otzanak

oinetakoei galderak egiten dizkiet

Madrilgo metroan

so egiten diet bekoz beko

begirada urdurien begirada lasaien

begirada harro triste hezigaitz egarrituen beldurrez

begirada depresiboen

begirada auhenkarien eta otzanen lotsaz

oinetakoek jendea bere soinera daramate:

bakun izate hau den gaitza

ez entzuna egitea berbaro izutu horri...

euretakoa naizela esan didate zapatek

Madrilgo metroan