EZ DIRA NIREAK

maite dudan eskua ez da nirea

maite dudan herria salduta dago

maite dudan emaztea joan egingo da

pertsona izan gura duen harria nahiko nuke izan

hezur-mamira etortzeko ahalegin eroan

baina negu minean iratzarritako zapoa naiz

inork maite nauenean

iruditzen zait azken aldia behar duela

betiko izango dela azal-mintzeko lorratza eta likina

beste inorentzat bide berria zidorrean...

nondik ez dakit nori ere ez

baina idatzi egingo dut bizi naizen arte

(idatzi gabe ere bizi da jendea

idazten ez duen jendea ere bizi da)

maite dudan eskua

maite dudan herria

maite dudan emaztea

ez dira nireak

harria ari du jendearen gainean

eta ni ez naiz ni bakarrik:

ahotsak entzuten ditut besteren buruetan