GOSARIA

jendeak ontzi bat bezala betetzen denean

edo oihanpe itsua legez zarratzen bada

egiten du planto

eta maiz horrela uzten dio bizitzeari

bestela bota egiten dute

edo ezabatu eta ahantzi

bart semea hurbildu zait

gau beranduan loak hartu ezinik

hil ondoren zer gertatuko zaion kezkarekin:

hosto jausien dantzak

eta haren ahots hauskorrak

estali didate munduaren ikusmira...

musu eman eta ohera doa

auzoen erlojupeko orduen segida

ezin dela nekarazi pentsatu

eta umearen ezpain hezeetan

etorkizuneko kanpalekuak eta

ibaien ibilgua bistaratu zaizkit

argia amatatzeaz bat

goizean semeari paratu behar nion

gosariarekin aurre-gozatu naiz etzan orduko

eta loari gutun laburra idatzi diot aire beltzean...

oker nenbilela uste dut

uste dut geu beste ezer ez dela geure geroa

baina jende artean jokatzen dela