HAREATZATIK

Zure katilu urdinean gosalduta nago.

Kaialderantz ikusi dut kaio saldo asaldatua

elkarrekin promenatzen ginen lekutik igarotzean.

Lainoak maindire zuri batekin estalia dauka Baiona;

goiz da, inor ez dabil hareatzan, eta

ogi erre usaina dator boulangerietik.

Ez dizut esan: nire patrikek zuloak dituzte

etxeko giltzen hortzek astiro janak.

Zuloetatik galdu zaizkit zure oroitzapenak,

patrikek ez baitute sentipenez fitsik ulertzen.

Goiz da, inor ez dabil hareatzan, eta

langarra dator mendebaldetik.