Album
Formol Laborategia
Album
Formol Laborategia
Azaleko irudia: Dani Fano
Diseinua: Metrokoadroka
2022, antzerkia
174 orrialde
978-84-17051-96-9
 

 

Zoriontasun puska

 

Uste dut gu garela

arazo bat izango du

gure belaunaldiak

eta zaila izango zaigu eustea

norabait lotzea

 

besteen bizkarrak helduleku

zailak dira begietara begira

uler diezaioten

nahi duenarentzat

 

uste dut agian ez garela

errudun guztiz gu, baina

gugan daude jatorri

zehatzik gabeko

tristuraren hondarrak

 

errepide luze baten erdian

egurrezko aulki bat zabaldu

eta zain ikusten

dut geure burua

etorkizuna eta iragana zein

norabidetan dauden ez dakigu

eta zain

 

nora korrika egin baino

non gauden pentsatzea

da irtenbide bat

agian bakarra

zeruaren dimentsioak

gehiegi dira

eta lurrera begira

lasaiago sentitzen garela

ematen du

 

niri ahaztu egin zait

hamasei urte bete nituen eguna

ahaztu egiten zaizkit

gauza asko

informazio gehiegi dugu

egunero

eta ahaztu egiten zait

zaila delako gordetzea dena

eta dena nahi izatea

eta nahi batzuk

eta denon beldurrak

hezur-haragizko interakzio

mekanizatuak

eta bakardadearen gogoa

edo izua

 

hori gara

 

maite duguna zaindu

nahi dugula sentitzean

eta nahiko genukeen bezala

egiten ez dugula ikustean

dator arnasa zatikatua

 

uste dut gu garela

burezurrean tristura asko

hondoratuko duen belaunaldia

 

denboraz ere ahaztu naiz

nahastu egiten naiz

trabatu hizketan eta

haragi bizitan bakarrik

azal dezaket nahi dudana

 

uste dut ez dakidala

askatasuna zer den

erabatekoa ez bada

galdu egiten naiz

 

egutegiak eta erlojuak

kendu nituen

haize gris arin batek

balio duelako

urteek eta zenbakiek ez bezala

arnasa hartu nahi dut

itota egon naizelako

eta errepide huts batean gaudela

ahaztu egiten zait

arnastu dezakegula hemen ere

baina lurrera begira

eta ez da nahikoa

 

ez dakizkigu gauza asko

eta ez dakiguna

jakin behar dugu

eta pisu iraunkor bat da

baina jakin nahi dugu

dena

eta irudi asko ahaztu zaizkit

eta eraiki ditut beste asko

 

eta bizirauteko aireratu

egiten gara errealitatetik

eta asmo berriak

ditugu etengabe

baina nekatu egiten gara

 

ahaztu egiten zaizkigu

gauza asko

oroitzapen batzuk

desagertu dira

nahikoa dugu orain

aulkian zain

gertatzen dena ulertzen

eta nik ere nahi dut

uler diezadaten

kezkatzen gaituena

nahi bezain ondo

ulertzen ez dudan arren

eta bizkarra gara

gu ere askorentzat

 

uste dut ez dela

gure belaunaldiaren errua

baina errepide luzeetan

aurkitu dugu geure burua

eta nora lotu ez dakigula

aulkitik altxatzen gara

gero berriro esertzeko

eta zain

 

uste dut gu garela

arazo bat du

gure belaunaldiak

baina ez da guk sortua

 

eta

 

ezin gaituzte ulertu

errepide luzean

geure burua nolabait

irribarre lasaiz

zoriontasun puskaz

aurkituko genuela

esan zigutenek

 

aurkituko gara

norabait lotu

oraindik ez dakigu

nola

eta zain gaude

 

Eider Perez Adeletx

Irutxuloko Hitza (2020)