TOKI DOTOREA

Ez da erraza korridoreetan barrena

antxintxiketan ibiltzea

argiak amataturik ateren bat topatzeko esperantzaz

atzetik segika duzula lege likatsua

hilak bailiran segika,

orduan horra hor 303 zenbakia, barrura, katea jarri,

eta orain ate-joka dabiltza eta orroaka,

gero adeitsuki hasi dira zentzuzko arrazoiketetan,

gero erreguka,

baina zorionez

etxejabeak nahiago luke ateak zutik

irautea ni kartzelazuloan

egotea baino...

«... mozkorrak dago barruan

emakumezkoren batekin. abisu egin nion,

ez ditut horrelakoak onartzen,

hau toki dotorea da, hau da...»

handik gutxira aldegin dute;

egizue kontu ez dudala inoiz

errenta ordaintzen;

egizue kontu baimena eman beharko

lioketela gizon bati

edateko eta emakume baten ondoan esertzeko

eta eguzkia irteten

ikusteko.

txapa kendu diot poltsako beste botila bati

eta bera baztertxo batean eseri da

erretzen eta eztulka

New Jersey-ko izeko zahar bat bezala.