POEMA-EGILE MODERNO ETA
ARINEN GAINEAN BERBA BI

Aski erraza da moderno-itxurak egitea

errealitatean inoiz jaio den

lerdorik puntakoena bazara ere;

badakit: nik ere poema izugarri zatarrak sortu ditut

ez ordea

aldizkarietan leitzen dudan zaborra bezain zatarra;

nire zintzotasuna puten eta ospitaleen fruitu da

eta ez dit permititzen itxurak egitea

ez naizen zerbait emateko...

eta hori akats bikoitza da: jendearen akatsa

poesian

eta jendearen akatsa

bizitzan.

eta poesian huts egiten duzunean

bizitza huts egiten duzu,

eta bizitza huts egiten duzunean

sekula ez zinen jaio

igoal dio estatistikek

edo zure amak jarri zizuten izena.

tribunak hildakoek gainezkatzen dituzte

irabazle baten alde oihuka

bizien mundura

bueltan ekarriko dituen zenbaki baten irrikan,

baina ez da horren erraza...

igoal-igoal poemarekin:

hilda bazaude

lurrazpian ere egon zintezkeen

eta pikotara bidali idazmakina

eta tontoarena egin

poemekin  zaldiekin  emakumeekin  bizitzarekin:

irteerak

leporaino betetzen ari zarete...

hortaz, irten hemendik agudo

eta utzi bazterrean

orri apur

maitagarriok.