Disoluzio agiriak
Disoluzio agiriak
2019, poesia
128 orrialde
978-84-17051-23-5
azala: Xabier Gantzarain
Jose Luis Otamendi
1959, Azpeitia
 
2014, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

HAIZE LEHOR BAT

 

 

orube garbitu berri baten antzera

begiratzen diot inoren bakardadeari leihotik

muxiken lurrinak ferekatutako airean

lurra mugitu egiten da

piano teklen artean bizi bagina bezala,

halako batean baina iristen da loa

lupetza abisaletan

 

gatzontziko arroz aleak nola

nire pentsamenduak hezetasuna xurgatzen du

bakeari herrari amodioari kentzen die bustia:

behiala arnasari eutsiz

erori ginen disoluzio honen erdian

bestelako opari baten zain agian

hainbeste dantzarirekin lotuan egitear

 

albistegiaren aitzinean

aukera hobegarriak datozkit burura:

banketxe bat zure oin-arrastoen xerka badabil

zer egin jakitea

zelan palagatu polizia suminduak

edo hienen malkoen sommelier izateko ikasi

 

nago gezurrak beste erretzen dituenean begiak

euriak hotzak goseak

haustura sozialaren salbamendu oholari eustea

gaurkoa historiaren lekedaz

ito nahi izateko era bat dela

sugeak lo diren urte sasoian aizkorak gorestea

alferrik hil omen zirenez hitz egitea

intxaur hautsi artean

epailearen mailuz ebatziko bailitz

bizitzearen edo hiltzearen afera

 

nire pentsamenduak

hezetasuna xurgatzeko ahala beretu du

neguko ilunabarretan frogatua dut:

jendea bere burua

beste nonbait jarri nahian hasten denean

edo ni neu nazio berri baten aldarrian tinko

neure baitako desertu txikian

aurrera banator oinazpi kiskaliekin

orainaldi urrun hau ez beste bazterrak

aurreikusteko ezain

 

denborak gauza gehienak higatzen ditu

ez akordua eta ederra soilik

merkatuaren putzuan igeri

klase kidetza berrien xerka

mendeak emango ditut palazioak jasoz

hondar gainean

eta bakardade hedakor hau

nortasunaren eraikitze sozial gisa berretsiko dut:

isolamenduaren sokatik badarik ere

mundu honi lotuta segi