Poz zuriaren eskeletoa

Gau ilunaren altzoan,

  Sentsazioen apar berdaska

  Uhinen konpas mantsoan,

    Sentipen hitsak murgildu dira

    Tristuraren itsasoan.

      Bizitza, zumar hosto gabea:

      Haize urdinak soildua.

        Irudimena, zakar tartean:

        Burni zahar herdoildua.

          Bakardadea, harkaitz gainean:

          Kaio gaixo koroildua.

          Zentzu horiztak erdi arrastan

          Pena bustien larrean,

        Etsipen beltza hankutsik doa

        Ur ertzeko hondarrean,

      Desio grisak: aingira hilak

      Gogoaren otarrean.

    Esperantzaren ontzi berdea

    Galdu da uren marean

  Amets aingurak hondora doaz

  Itsaso zabal barean

Mila arrai beltz trabatu dira

Oroimenaren sarean.