Gauerdian lehunki dabil brisara arina

Ur geldiaren axala kirimolatzen,

Hostoak espazioan, goiti eta behiti irristan

Isiltasunaren kristalean dostatzen,

Erreka zintzurrak behiti, bihurrika datoz urak

Gau lamien adatsak txirikordatzen...

Hutsetik zintzilik ari dira armiarma jostunak

Amodioaren sare finak brodatzen,

Baina, zer ajola dit niri, edertasun guzi horrek

Ez bazara nitaz inoiz akordatzen.