Diamantezco espazioan

Hodei goibel illuncara,

Eguzquiaren arguitasuna

Bilduaz bere baitara,

Arrastan dabil bere itzala

Lurrean harat honara.

Hodei beltzaren zulo tartetic

Argui izpien icara,

Euri tantequin gurutzatu da

Eguzquiaren dardara,

Ostadarrac zubia eguin du

Errecatic errecara.

Eguzqui printza coloredunac

Murguiltzen dira urpera,

Ibai ertzeco zumar hostoac

Ur axaleco urrera,

Harripetic irteten arraiñac

Ostadarra icustera.

Hegazti izuac yolas alaitan

Hegatu dira aidera,

Zuritic urdiñera lehenbici

Guero gorritic berdera,

Ostadarrean pocic dabiltza

Hari batetic bestera.

Pinpilinpauxac atera dira

Coloretaco arguira,

Chori ttipiac arcu azpian

Berriquetan ari dira,

Cucua cantura etorri da

Ostadarraren harira.

Euri tantoac gueldiro datoz

Larre zabalen erdira,

Lau hormachori pausatu dira

Zubi pintatu-berrira,

Bata baranda hori gaiñera

Beste hirurac gorrira.

Eguzqui printzen hecetasuna

Heltzen da ibai zocora,

Arrobioac atera dira

Bideco euri gozora,

Atseguiña zazpi coloretan

Sartzen da bihotzondora.

Ostadarraren hari leunec

Harpa dacarte gogora,

Musica yotzera etorri da

Haicea zubi ondora,

Basapiztiac lilluraturic

Dantzara irten sorora.

Alegrantzia colorezcoac

Hautsi du bere aingura,

Ceru goibelac eracusten du

Nostalgiaren mindura,

Cale bustian irristatzen da

Euri zaharraren lillura.

Ostadarraren hari leunei

Yoan eguin zaie pintura,

Hodei uhelen zuri larua

Grisasta hitsen hildura,

Melancolia dacarqui brisac

Laiño illunen tristura.