HISTORIAKO MUSURIK LUZEENA

       (Notorious, 1946)

Ingrid eta Cary

elkarrengana hurbildu kaixo

elkarrengandik urrundu agur

laztan bat eta gero amildegia

hemen gelditu bi pauso harantz

balsean baileuden

begi bat begi baten barruan

ezpain bat ezpain baten hondoan

ezin hurbilurrutiago

jira-biraka

aterantz mahairantz

beti rantz

(rainoaren uko mitikoa),

izerdi patsetan ni, bustitzeke beraien ezpainak

(hain baitira haragigabeak)

neke-neke eginik

etengabe darraizkien kamerak ez baitie

atsedenerako arnasarik ematen

agortu da oasi izartsua

ahoratu dut kraska azken krispeta

musu infinituaren erreinua desagertu baino

ehun mende lehenago.