Elkartasun basatia
Elkartasun basatia
2013, poesia
112 orrialde
978-84-92468-46-1
azala: Idoia Beratarbide
Oier Guillan
1975, Donostia
 
2020, nobela
2009, poesia
 

 

ESAN GABE DOA

 

 

Minarena naiz zorionarena beste.

 

Esan gabe doa

 

Jendez beterik dagoen gutxiengo batekoa naiz.

 

Esan gabe doa

 

Beldurrarena naiz pozarena beste.

Diot. nintzen. Diot. nintzen. Diot. nintzen. A.

 

Esan gabe doa

 

Erbestearena naiz aberriarena beste.

Eskuak garbitu eta haiei so

diot: nor naiz hau.

Hanka lokartu ostean orratz batekin ziztatu

eta zera pentsatzen dut:

norena da nirea den min hau.

Edo:

zergatik du nire antza haur honek.

 

(Isilunea).

 

Zergatik dute nire antza alkandorek

Zergatik dute nire antza mesanotxeko liburuek

zergatik dute nire antza familia argazkiek

zergatik dute nire antza eltxoek

zergatik dute nire antza etxeko zapatilek

zergatik dute nire antza maite ditudan pertsonek

zergatik dute nire antza nire antzik ez dutenek.

 

Esan gabe doa

 

Lekuz mugitzen den airea da denbora.

 

Esan gabe doa

 

BELDURRA airea IRAULTZA airea GEZURRA airea

BERUNA airea BIZITZA airea ZARATA airea

GARUNA airea DENBORA airea GARENA airea

GINENA airea HIZKUNTZA airea AHOTSA airea

 

Esan gabe doa

 

A.

 

Esan gabe doa

 

Mmm.

 

(Isilunea).

 

Nggsssb.

 

(Isilunea).

 

Jjjjsssssbba.

 

(Isilunea).

 

Esan gabe doa

 

Jendea naiz, jendea ez naizenean ere.

Familia naiz, familia ez naizenean ere.

Herria naiz, herria ez naizenean ere.

 

Esan gabe doa

 

Arrotza naiz, arrotza ez naizenean ere.

Mamua naiz, mamua ez naizenean ere.

Manikia naiz, manikia ez naizenean ere.

Bufoia naiz, bufoia ez naizenean ere.

Normala naiz, normala ez naizenean ere.

 

(Isilunea).

 

Minarena naiz.

 

Esan gabe doa

 

Oldea naiz, oldea ez naizenean ere.

Lotzeko aske izan nahi duen izen bat.

Hurrengo hitzordu iraultzailea bermatzearren

hilabete amaierara iristeko beharrean den ahoa.

Makurbilisa, zikoitzustela, erraitsua, buruberoa,

isilozena, eskulerdea, bihotzokela, zangolistorra.

Bizarrak egunero eraldatzen duen betiko bera.

Zakilzuloari begira «nortzuk dira horiek» galdetzen duena.

Egunero esnatu eta mundu arrotz bat topatzen duen hura.

Gauero lokartu eta mundu arrotz baten beldur den hori.

Lur honetakoa naiz bertan egiten dudalako lo.

Lur honetakoa naiz aire honek mintzo nauelako.

Lurrik gabe ez dago airerik.

Airerik gabe ez nago ni.

 

Esan gabe doa

 

Haiek naiz gu naizenean ere.

Lurrikara baten beldur esnatzen den itsua.

Bizirauteko pilulak behar dituen edonor.

Arnasaren beldur den hildakoa.

zu. ni. zu. ni. Haiek. gu. ni. zu.

Maitatzeko beldur den poeta.

Superwoman izatea deliberatu duen etxegizona.

Iraultza inori esan gabe egiten duen zalantzatia.

«Maita nazazue, kabroi alaenak, maita nazazue» dioena.

Negar egiten duen lorazain alergiaduna.

Politgizena, edersudurra, librezidorra, hankabustia,

erdiliraina, zorionkeriaz blai dagoena.

 

Esan gabe doa

 

Ahanzturarena naiz oroimenarena beste.

 

Esan gabe doa

 

Zer da hau.

Nork diot.

Zertarako bu.

Zergatik kha.

un. an.

O.

 

Minarena naiz zorionarena beste.

Minarena naiz zorionarena beste.

 

O.

 

Esan gabe doa

 

Eguna beti hasten da ni gabe.

Badira egutegietan azaltzen ez diren zaratak.

Ileak topatzen ditut espero ez dudan lekuetan.

Neure ahotsa grabatu ostean ez dakit nor naizen.

Argazkietan ezagutzen ez dudan begirada bat dut.

Nire lagun guztiek gordetzen dituzte nitaz

nik oroitzen ez ditudan gauzak:

esandako eskuak,

keinuak,

zorneak,

promesak,

mozkorraldiak.

Neure buruaz ahaztu dudan guztia naiz,

eta agian oroitzen dudana da ez naizena.

Ez dakit nor noan.

Ez dakit nora diodan noiz.

Eta hunkitzen naiz hunkitzen den norbait

hunkituta ikustean,

hunkitzen naiz hunkitzen den norbait

hunkituta ikustean hunkitu dela ikustean.

Edertasuna arriskutsua iruditzen zait

itxaropena sortzen duelako.

Eta goiz batzuetan ni neu

polita sentitzen naiz

eta beste goiz batzuetan ez.

Batzuetan nire begirada sexia da

eta beste batzuetan ez,

eta batzuetan fuck eta besteetan iau,

eta batzuetan ieup eta besteetan zkark.

 

Esan gabe doa

 

Minarena naiz zorionarena beste.

Jendez beterik dagoen gutxiengo batekoa naiz.