BESTEAK

gure antza dugu

baina ez gara

gu bezalakoak:

titular bateko protagonista izateari uko egin

bizirauteko aukerak zenbatu

artizarrari begira zigarro bat piztu

sudur handia eta ipurdi iletsua eta

titi txikiak eduki eta pozik egon

euria egiten duenero larrua jotzeko grina izan

gorantz doazen maldak beherantz korritu

norbait hizkuntza arrotzez mintzo denean gozatu

inori deus esan gabe atzerriak zenbatu

musika entzun eta abesten saiatu

inork «dakizkidake» esandakoan bizarra moztu

bilera batera joan eta ezer esan ez

bilera batera joan eta etengabe gaia aldatu

zakilari eragin eta eskuak usaindu

uzkia igurtziaz batera belarrira xuxurlatu

alua ferekatu eta atzamarrak milikatu

ezinezkoa denean ere heterogaya izan

famili bazkarian euria itsaso hautsi bat da esan

eta algaraka lehertu modu kezkagarrian

gazteagoei kontzertu hartakoak kontatu

eta onartu oraingo hauek direla garai onenak

azkazal hautsiekin zer egin erabaki behingoagatik

gure antza dugu

baina ez gara

gu bezalakoak:

sartu burua komun zuloan zer sentitzen den jakiteko

pixa egin ohearen alboan eta gero ahaztu

hordiak atrapatu antzerki oihal batean bildurik

hunkitu agureak kalean astiro paseatzen ikusteaz

eta pentsatu: agian putakume batzuk izan ziren gaztetan

irrikatan egon lantokira joateko

ez lagundu zure premia duen lagunari

eta biharamunean bai baina berandu

ez esnatu garaiz ez jaiki ez jantzi

zirkuko akrobata batez maitemindu

zuretzat garrantzitsuenak diren gauzak

gorroto dituen harekin liluratuta geratu

eta erremediorik gabe zoriontsua izan

beltzez pintatu sukaldea

urteak bete eta urteak hustu

betiko ikusezina bihurtu

disolbatu bizitzan gatz edo azukre

eguneko aldartearen arabera

uholde arriskua dagoen egunetan

leiho guztiak zabaldu eta aldarri egin:

hilkorra naiz eta zer arraio

goxoa dago kafe ziztrin hau

gure antza dugu

baina ez gara

gu bezalakoak