Txoria

Segundoak mokokatzen dituen txoria.

Minutuak irensten dituen txoria.

Orduak digeritzen dituen txoria.

Oroimen-txoria,

kanpai-hots antzina itoa

orainaldira dakarrena.

Paperezko kukurutxoan

harrapaturiko txoria, malkoen lekeda batean

eseritako txoria,

zigor-ziegazko liburuen sakontasunean

hegalak astintzen dituen txoria,

oroimenaren esklabo den

txoria, idaztearen esklaboa,

paisaiaren laugarren dimentsioa

ezabatu zuen txoria,

orain erraietan txioka ari dena,

hezur hutsa den txoria, bulartxo

zikin hauskorra den txoria,

lumaje itsatsia den txoria,

azkazalaren atzeko hatz-bizarra den txoria,

jada inoiz ere

bakerik ez izateko zio den txoria.