Etxearen anatomia

Epidermis ekzematiko

eta urratuaren azpi-azpian

atso-xuxurla frenetikoa.

Hazkura.

Teilatupean,

zahartzen ari den argiaren esklerosia.

Sotoaren birika urdinduetan,

ilunaren tuberkulosia.

Eta ilargiak ere ez du

esnezko antibiotiko tantarik

luzatzen.

Hormak ez daude elkarri ondo itsatsita,

sekretuaren malko odolezkoak

darizkie eraikineko galeriei.

Baina eskeleto osoaren azpian,

mahai eta ohantzeen,

beila eta ametsen,

estufa eta katiluen

organo harrigarrian

bizitzazko ehun beroa:

zorion hautemanezinaren

biosintesia,

etorri eta alde egiteko energiaren

biosintesia,

hiriak eraiki,

arropa garbitu,

maitatu,

gorrotatu,

epaitu

eta ulertzeko energiarena.

Eta gelaz gela,

zelulaz zelula,

zuntz ikusezinetatik gaindi

zirkulatzen da belaunaldien memoria:

Etxea.

Harria harri gainean

dagoen bitartean,

eta gizon bakar bat,

eta emakume bakar bat.