Bost minutu aire-erasoaz geroztik

Plzeň hirian,

Tren-geltokia etorbideko 26. zenbakian

igo zen emakumea hirugarren solairura

etxe guztian tente zirauten

eskailera bakarretatik,

zerura ematen zuen

atea ireki

eta zurrundu egin zen

amildegiaren aurrean.

Zeren hemen

bukatu baitzen mundua.

Gero

ongi itxi zuen atea, giltzaz,

agian inork

haien sukaldetik

Sirius

edo Aldebaran

har ez zezan,

eskaileretatik jaitsi

eta behealdean eseri zen

zain

etxea berriz

noiz haziko

eta errautsetik senarra noiz itzuliko,

eta haurrak hankatxoetatik noiz lekedatuko.

Goizean goiz aurkitu zuten

harri eginda.

Txolarreek ahurra mokokatzen zioten.