Arratseko natura hila protoplasmarekin

Etxeak arrastiriaren likenaz

estaltzen dira,

irratiko albistegiak

fatxadetatik egiten du gora,

hanburgesa bere artean kantari.

Horrelakoa-da-bizitza

izeneko protoplasmak

leiho guztietatik ateratzen ditu

atso-buru zoliak dituzten irtenguneak,

oinezkoak blaitzen ditu,

aurreko etxeko oheetan sartzen da,

malkoak, liskar-zatitxoak,

haurdunaldi eta abortuak xurgatzen ditu,

auto eta telebistak zikintzen ditu,

arrautzen prezioez hanpatzen da,

adulterioez puzten da,

exospora bihurriak bereizten ditu

gure-denboran-ez-zen-halakorik-gertatzen

Eta artean iluntzean distiratzen du

agortzen ari den itsaso hilak bezala

edredoien, marmeladen eta estratosferaren artean.