Barnerako bidaia

Mintzairaren iturrietara bidean

luzaro ibili zineten noraezean

harrien ordez begi irekiak dautzan gauerdiko lurraldean.

Gero bidea amildu zen izotza potxingoan legez,

eta erori egin zineten. Milaka urte.

Amaraunezko sototxo

idor leihogabe batean

zeundeten. Sabaian

bizpahiru berbatxo elbarri kuzkurtzen ziren

(ni... kanpo... berde)

eta zoruan ulua zebilen

biraka.

Ate-danbatekoa jo zenuten eta ospa.

Agian barnea, esan zenioten elkarri,

barnea, beharbada, kanpoan egongo da.