Munduaren hastapena

Hau zerua da

eta hau lurra,

lepondoko hotzikara bezalako zerua,

ahurretako azala bezalako lurra.

Hau zuhaitza da,

gorantz luzaturiko eskua,

hau harria da,

horizontearen malkoa.

Hau odola da

eta hau haizea,

patuaren bafada neurrigabea

iparraldera, ekialdera,

mendebaldera, hegoaldera,

hau gorde ezak,

hau hautsi,

hemen eseki txoria,

hemen hedatu bidea,

hemendik sakonera,

hemendik izarretarantz,

ez egin estropezu gero,

ez hadi hoztu.

Eta lehortu sudurra!