Basoa

Kanbriarraurreko baso batean

non txorien mamuek

granitozko bihiak kraskatzen

eta zuhaitzen estatuek

esku beltzez

hodeiak mehatxatzen dituzten,

bat-batean

dira burrunbak aditzen

historia

errotik aterako balitz bezala,

belarra laztu egiten da,

harritzarrek dar-dar dagite,

arrailtzen da lur azala

eta hazten

esnegorria,

bizitza bezain neurrigabea,

bizitza bezain neurrigabeak diren

mila milioi zelulaz betea,

betierekoa,

urtsua,

mundu honetan estreinako aldiz

eta azkenekoz.